Saltfiskur

Hvaða gáfnaljósi datt nú í hug að koma á fót Saltfisksetri í Grindavík? Hvaða séní var það sem reiknaði út að slíkur glórulaus fábjánaháttur borgaði sig?

174 milljónir kostaði að koma þessari stórbrotnu hugmynd á koppinn. Af öllum þessum milljónum lágu þrjár í stofnfé, 45 voru sníktar út úr hinum og þessum sjóðum og lán slegið fyrir afgangnum - 126 milljónum króna, m.a. frá Grindavíkurbæ sem væntanlega hefur séð fram á gífurleg uppgrip í bænum í kjölfar opnunar Saltfisksetursins.

Skv. frétt Morgunblaðsins í gær um málið þarf Saltfisksetrið í Grindavík að punga út 27 milljónum á ári í afborganir og rekstrarkostnað - tekjur eru hinsvegar 5 milljónir! FIMM! Fimm milljónir var hægt að kroppa af þeim 12.000 hræðum sem villtust inn á setrið á þessu ári og nú vonast aðstandendur setursins til þess að á næsta ári verði gestirnir 20.000 - eins og það breyti einhverjum sköpuðum hlut!

Og hvað er sosum til sýnis á saltfisksafni? Jú, salt sennilega, og kannski fiskur - saltfiskur og hann er jú lífið sjálft ekki satt... eða var það öfugt?